Versión PDF

Redaçom/ Podes ver já aqui "Quarta-feira logo vem", um documentário da Comissom de Língua da Gentalha, de algo mais de 10 minutos de duraçom, que "reivindica a recuperaçom das denominaçons tradicionais" dos dias da semana, construídas com a palavra feira (segunda-feira, terça-.feira, quarta-feira, quanta-feira e sexta-feira), que continuam vivas ainda em muitas partes da Galiza.

O documentário junta testemunhos da zona da Límia Baixa, que empregam até a sexta-feira, e gravaçons realizadas por membros da Comissom de Defesa da Língua da Gentalha em aldeias dos arredores de Compostela: "O objetivo do filme é mostrar como nestas comarcas as pessoas passárom de quinta-feira a jueves. Só nos últimos anos fôrom introduzidas através do ensino e da televisom umhas novas denominaçons, semelhantes às do castelhano e pouco abonadas no galego tradicional".

Um sistema único

A denominaçom dos dias da semana através do sistema de "feiras", em lugar dos nomes latinos pagaos imperante no resto das línguas romances: Lunae dies, Martis dies, Mercurii dies, Jovis dies, Veneris dies, Saturni dies e Solis dies, devemos-lho a Martinho de Dúmio, quem no seu empenho cristanizador efetuou a substituiçom da terminologia pagá pola nova a base de feiras, cristiá, da sua invençom.