Versión PDF

Redaçom/ A entidade soberanista Causa Galiza vem de anunciar a sua decisom de abandonar o Novo Projeto Comum, quando falta somente um dia para a assembleia constituinte que formará a nova força política. Causa Galiza acusa os dirigentes do Encontro Irmandinho de dirigir por métodos antidemocráticos o processo, ao passo que denuncia a sua exclusom da proposta de Coordenadora Nacional e o empenho em confluir com Compromiso por Galicia.

Balanço do processo

O comunicado divulgado pola plataforma resume a sua implicaçom no processo promovido por Beiras, insistindo nas partes positivas que tivo. Assim, reconhece que os textos do NPC, onde se aposta pola "independência", demonstram "umha vontade de superar complexos e tabus" históricos do nacionalismo galego a respeito da ruptura com Espanha. Aliás, declaram que nas assembleias do NPC se notou "um alto nível de sintonia política" com as bases do Encontro Irmandinho e com os nacionalistas sem adscriçom partidária que participam nelas.

Porém, detalham também os "aspetos negativos", entre os que aludem aos "piores vícios e práticas" nas assembleias ou ao dirigismo dos líderes do E.I., que personalizam em Mario López Rico, Luís Eyré “Palleiro”, Antonio Araúxo e Carlos Méixome (aos que se referem chamando-os "o sanedrim"), que teriam "pilotado desde acima" o processo, torcendo a vontade das assembleias. 

Entre as decisons deste "sanedrim" estaria umha proposta de direçom, a validar pola assembleia deste sábado, que nom inclui nengum membro de Causa Galiza, "apesar de apostarmos nele [no processo] contra vento e maré desde o momento zero". A proposta de direçom supom "a nossa exclusom prática do processo", segundo o comunicado da entidade soberanista, feito público o dia seguinte à apresentaçom da listagem por parte do E.I.

Aliás, a determinaçom dos dirigentes do Encontro Irmandinho de confluir numha aliança eleitoral com a direitista e autonomista Compromisso por Galicia é analisa por Causa Galiza como umha contradiçom com o discurso independentista, além de umha imposiçom dirigista ao processo assemblear. 

Buscarám um Dia da Pátria independentista

Perante esta situaçom, Causa Galiza resolveu nom participar na assembleia constituinte do 14 de Julho, e reafirmar a sua proposta de convocatória de um 25 de Julho independentista, umha "mobilizaçom unitária dos setores independentistas e soberanistas". A menos de quinze dias da efemêride, nom se sabe ainda como poderá concretizar-se esta proposta, nem o seu possível sucesso. 

Segundo se sabe, tanto a FPG como o Movimento pola Base continuam no NPC, enquanto NÓS-UP mantém a sua convocatória particular de manifestaçom.

Pode-se consultar o comunicado na íntegra na ligaçom de abaixo.