Redacçom / O periódico soberanista Novas da Galiza atinge neste mês de 15 de Março - 15 de Abril o número 88, com o que iguala ao primeiro jornal independentista do país: A Fouce, editado entre 1926 e 1936 polos arredistas galegos da Sociedade Nazonalista Pondal na emigraçom em Buenos Aires. Um boletim especial da autoria de Bernardo Penabade acompanha este simbólico número do Novas da Galiza, com o que, sinalam, "queremos homenagear todos os projectos de que nos sentimos continuadores, nomeadamente a Fouce", projecto sobre o qual estám a preparar um livro. O boletim especial, maquetado conforme a estrutura d´A Fouce, contém entrevistas a Xosé M. Núñez Seixas -historiador do arredismo galego- e José Manuel Aldea, director da Gralha e primeiro director do Novas da Galiza.

Contudo, outros historiadores indicam que é possível que existam números d´A Fouce de mais adiante de 1936, embora a crise da guerra terminara por rematar com o projecto. Do Novas da Galiza sinalam que som conscientes destes factos (a partir de 1941, saírom os números do 89 ao 102), mas Bernardo Penabade considera que nessa época nom todo o colectivo editorial do periódico se sentia identificado com eles, já que o influxo do PCE rebaixou a sua ideologia independentista.