Versión PDF

Redaçom/ A companheira de Galizacontrainfo, Zélia, foi absolvida esta semana no processo judiciário relativo à ocupaçom da estaçom marítima durante a greve do metal de 2009 em Vigo. O próprio fiscal reconheceu a inexistência de provas contra Zélia, que ficou assim eximida dos cargos de desordens públicas e danos, polos que até entom se lhe pedia umha condena de quatro anos de cárcere. Zélia ocupava na altura da greve do metal o posto de responsável de imprensa da CIG em Vigo.
O julgamento tivo lugar lugar a passada terça-feira, e durante o mesmo a fiscalia decidiu rebaixar a petiçom de penas contra os outros dous imputados, Antolín Alcántara e Ramon Sarmiento, responsáveis da CIG e CCOO. Dessa maneira, à espera da sentença que se publicará nas próximas semanas, os dous sindicalistas enfrentam-se a penas de dous anos e meio (Alcántara) e dous anos (Sarmiento).

Um mês de distúrbios
Os factos remontam-se à duríssima greve do metal de junho de 2009, quando os operários do metal de Vigo se negárom a aceitar um convénio coletivo que degradava as suas condiçons laborais. O conflito saltou às ruas, com manifestaçons reprimidas por cargas policiais, que à sua vez eram constestadas com fortes confrontos, barricadas e lume.
O 4 de junho a carga policial partiu em duas à manifestaçom, e umha parte dirigiu-se à estaçom marítima. Segundo os advogados defensores, “buscando umha saída” perante a agressom policial; segundo o fiscal e a polícia, tentavam chegar ao porto para ocupar o trasatlántico Independence of de Seas, que esse dia atracava em Vigo com 4.000 turistas a bordo. Em qualquer caso a ocupaçom nom se produziu, retirando-se os manifestantes antes de chegar ao porto. A repressom, porém, continua dous anos depois.