Manifestaçom de Compostela confirma a força ascendente dos movimentos normalizadores

Longe das polémicas numéricas sobre quantos milhares de galegas assistírom, a manifestaçom do 18-O tivo umha força incontestável. Num panorama tremendamente adverso para o idioma, as multidons que ocupárom a capital pola segunda vez num ano, demonstrárom que a defesa do idioma vive um relativo reponte. Desde o autonomismo mais acomplexado até o independentismo mais combativo -passando por um sem fim de galegos sem ubicaçom política clara- a defesa da língua coloca-se na agenda. Frente a aparente omnipotência das elites galego-hispanas de sempre (na economia, na política e na mídia) surge um país que ainda tem muito a dizer.

Compostela paralisou-se desde as onze da manhá do domingo, com o tránsito rodado varrido do mapa, e todos os bares do centro da cidade saturados de pessoas que acodiam à manifestaçom. Quase se poderia afirmar que, salvo a Galiza aderida à extrema direita instalada no PP e numha parte importante do PSOE, o conjunto da Galiza aderiu a um acto de reivindicaçom elemental, bem assistindo, bem secundando passivamente um berro unánime em favor da língua.

Correcçom política e ideias fortes.

De maneira mui semelhante ao que aconteceu nas grandes mobilizaçons do Prestige, a consciência de defender a própria dignidade foi o motor mobilizador das multidons. À margem de programas políticos, ou de umhas ou outras visons da língua, a grande corrente de arraste foi erguer-se contra as aldragens do novo governinho e os grupúsculos ultras que aguilhoam a campanha antigalego. Precisamente por esta condiçom do acto, e independentemente das siglas que convocarem, todo o mundo se sente parte dumha manifestaçom que representa a toda a Galiza mobilizada, com todas as suas singularidades e contradiçons.

Fora disso, e já nas minorias militantes, visibilizou-se um choque de discursos evidentes, que aluma razons de fundo mui contraditórias. Assi, as forças do autonomismo, além de aproveitar o acto para passear mediaticamente líderes e marcas políticas, patenteárom a sua obediência à falácia bilingüista. Num plantejamento ideal e nom conflitivo, abondaria com o reconhecimento hipotético dos mesmos deveres para galego e espanhol, para assi a nossa língua respirar tranquila. Da mesma maneira, obviam-se cuidadosamente as alusons à soberania galega, ou à dimensom internacional do idioma, elementos indigeríveis para a correcçom política. Desta maneira, e a um tempo que se apresentam como envolvidos numha causa social, estes sectores aproveitam os actos de massas para a sua particular promoçom política. O caso mais palpável foi o do ministro de justiça, o galego-espanhol Francisco Caamanho, que desfilou com escolta e livrou assi das iras independentistas. Trata-se do mesmo ministro que deitou por terra juridicamente a proposta de estatuto catalám, que precisamente dava à língua de aquel território estátus de língua nacional.

Em chaves opostas, o independentismo e o reintegracionismo circulárom na periféria da manifestaçom, com um bloco de seu dificilmente homologável ao central, e que apontava à necessidade da soberania, à conseguinte mudança do estátus jurídico-político, e à inserçom plena na lusofonia. Como vem sendo habitual, a laranjada tivo o seu espaço, assinalando com chorros de pintura os negócios mais odiados do país, a banca e lojas de roupa para ricos. O acto deste movimento, fundamentalmente articulado em volta dos centros sociais, rematou na Praça do Toural, onde se leu um manifesto próprio. Ainda que foi um encontro intergeracional, o bloco monolingüista caracterizava-se pola sua mocidade.

O poder da língua.

Sem pensar que um acto como este tem capacidade de seu para inverter a tendência pró-espanhola que se observa nas últimas décadas, si que pode abrir algumha porta. Porque a diferença de outros actos massivos (contra a guerra do Iraque, contra o ataque a Gaza ou contrá as marés negras), onde as multidons representam em manifestaçom a sua impotência, na luita pola língua demonstram em troca o seu poder. Nesta ocasiom nom se trata de saídas rituais à rua para influir em decisons de instáncias afastadas, alheias aos parlamentos e guiadas pola economia, senom da livre decisom sobre o dia a dia de galegos e galegas. Com umha legalidade desfavorável -como a que soporta este país desde há centos de anos- o idioma tem possibilidades de resistir, assentado da desobediência diária de milhares de pessoas. Porque se umha mudança de estátus jurídico-político semelha longe para a Galiza, a possibilidade de resistir e vitalizar o idioma está presente desde já na acçom de cada um.

Iniciativas complementares.

E como exemplo do antes dito, no dia 18 vimos também algumhas das iniciativas que a comunidade nacional está a activar em algumhas frentes. Já de tarde, e aproveitando a grande assistência à mobilizaçom, o parque de Belvis acolheu um novo encontro da conferência centro da Liga Nacional de Bilharda, onde pessoas de distintas geraçons provárom o auge deste desporto popular, plenamente normalizado lingüisticamente. Noutra orde de cousas, mas conectando com o espírito da jornada, o projecto da Galicola apresentou-se na Alameda, com um stand que logo esgotou as suas existências. A bebida, que dedica os seus fundos à promoçom do galego, também servirá para promover um concurso de projectos normalizadores, com a rúbrica de "prémio Ângelo Casal". Também esta bebida acadará rango de "oficialidade" nos encontros da LNB.